ഹിമായ@തുഖ്ബ

https://himayathuqbakmcc.com എന്ന വെബ് സൈറ്റ് മുഖേനയാണ് അപേക്ഷ സമർപ്പിക്കേണ്ടത്. അപേക്ഷകളുടെ പരിശോധനയ്ക്ക് ശേഷം അംഗീകരിച്ചവരുടെ ലിസ്റ്റ് ഹിമായ കമ്മിറ്റി പ്രസിദ്ധീകരിക്കുന്നതാണ്. ഔദ്യോ​ഗിക ഇഖാമയിൽ സൗദി അറേബ്യയിൽ പ്രവാസ ജീവിതം നയിക്കുന്ന കെ. എം. സി. സിയുടെയും മാതൃസംഘടനയുടെയും ആശയാദർശങ്ങളിൽ താൽപര്യമുള്ള ഏതൊരു മലയാളിയും (ജോലി ചെയ്യുന്നവർ, വീട്ടമ്മമാർ, കുട്ടികൾ) അംഗത്വത്തിന് അർഹരായിരിക്കും. മത രാഷ്ട്രീയ വേർതിരിവുകൾ ഇല്ലാതെ പദ്ധതിയിൽ അംഗങ്ങളാകാവുന്നതാണ്. ഒരാൾക്ക് പരമാവധി ഒരംഗത്വം മാത്രമേ സാധുവാകുകയുള്ളൂ. ഒരാളുടെ അംഗത്വം സ്വീകരിക്കുന്നതിനും നിരാകരിക്കുന്നതിനുമുള്ള പൂർണ അധികാരം കമ്മിറ്റിയിൽ നിക്ഷിപ്തമായിരിക്കും.

പ്രസ്തുത പദ്ധതിയിലേക്ക് ഓരോ അപേക്ഷകനും നിശ്ചിത വാർഷിക വിഹിതം നൽകേണ്ടതാണ്. സ്വരൂപിക്കപ്പെടുന്ന സംഖ്യ ഹിമായ കമ്മിറ്റി തീരുമാനിക്കും പ്രകാരം അർഹരാവുന്ന ആളുകൾക്ക് അവകാശപ്പെടുന്നതായിരിക്കും.

അംഗത്വം നിലനിൽക്കേ രോഗം അപകടം തുടങ്ങിയ കാരണങ്ങളാൽ അംഗ നഷ്ടം സംഭവിച്ചവരും, അംഗത്വം നിലനിൽക്കേ മരണപ്പെടുന്നവരുടെ (അല്ലാഹു നമ്മെ കാക്കട്ടെ) അപേക്ഷയിൽ നിർദ്ദേശിക്കപ്പെട്ട പ്രകാരം ക്രമമനുസരിച്ച് ആശ്രിതരും വിഹിതത്തിന് അർഹരായിരിക്കും. ആത്മഹത്യ ചെയ്തവരുടെ ആശ്രിതർക്ക് ഈ പദ്ധതി പ്രകാരം സഹായത്തിന് അർഹത ഉണ്ടായിരിക്കില്ല.

പദ്ധതി കാലയളവിൽ മരണപ്പെടുന്ന അംഗങ്ങളുടെ ആശ്രിതർക്ക് ഒരു ലക്ഷം രൂപയും (2023 മുതൽ തുടർച്ചയായി അഞ്ചാം വർഷവും അംഗങ്ങളായി തുടരുന്നവരുടെ ആശ്രിതർക്ക് ഒന്നര ലക്ഷം രൂപയും). അംഗ നഷ്ടം സംഭവിച്ചവർക്ക് 10000 രൂപ മുതൽ 50000 രൂപ വരെ ധനസഹായവും നൽകപ്പെടും. റബ്ബിന്റെ അലംഘനീയ വിധി കാരണം അർഹതപ്പെട്ടവരുടെ എണ്ണം കൂടുന്ന പക്ഷം ഉചിതമായ തീരുമാനമെടുക്കാൻ ഹിമായ കമ്മിറ്റിക്ക് അധികാരമുണ്ടായിരിക്കും. അതേ സമയം മിച്ചം വരുന്ന സംഖ്യ ഹിമായ കമ്മിറ്റി തീരുമാനിക്കും പ്രകാരം മറ്റു അവശ്യ ജീവകാരുണ്യ, വിദ്യാഭ്യാസ പ്രവർത്തനങ്ങൾക്ക് ഉപയോഗിക്കുന്നതായിരിക്കും.

മേൽ പറഞ്ഞ പ്രകാരം ഹിമായ ധന സഹായത്തിന് അർഹരായവർ ഔദ്യോഗിക രേഖകൾ സഹിതം ഏരിയ കമ്മിറ്റി മുഖേന ഹിമായ കമ്മിറ്റിക്ക് അപേക്ഷ നൽകേണ്ടതാണ്. ഈ നിയമാവലിയിൽ പരാമർശിക്കപ്പെടാത്ത വല്ല സാഹചര്യങ്ങളും ഉണ്ടാവുന്ന പക്ഷം കെ. എം. സി. സി തുഖ്ബ കമ്മിറ്റിയുടെ അറിവോടെ ഇസ്‌ലാമിക വീക്ഷണങ്ങൾക്കനുസൃതമായി ഹിമായ കമ്മിറ്റി എടുക്കുന്ന തീരുമാനങ്ങൾ അന്തിമമായിരിക്കും.